ITJHATHA YOKUZIPHATHA OKUHLE
Siwele umlambo womlando sisuka ehlelweni lokungalingani nelenturhu, sitjhinga emphakathini osekelwe etjhejweni lobuzwe bawo woke umuntu begodu olwela ukulingana. Siqala emva amakhambo namasiko ahlukeneko asilethe ekululekweni nentandweni yenengi, begodu sizibophelela kileyomiqondo namagugu wokuziphatha okuhle asihlanganisa ekuhlukaneni kwethu.
Ngalokhu kuzinikela kwawo woke umuntu, okumphumela wokulwela ikululeko, okuzibophelele ekupholiseni amanceba wakade, ukuqinisa isithunzi sawo woke umuntu, kanye nokufuna bona boke abantu bethu banzinze ekuhlaleni nekufumaneni iinsiza zepilo, sizibophelela ekuvikeleni nekugcineni amagugu atholakala kilomtlolo. Senza lokhu ngokuvuma bona ikusasa lethu liyame ekuvikelweni kwebhoduluko nehlalakuhle yabo boke abaphila ngaphakathi kwemikhawulo yethu, abahlala enarhakazini ye-Afrika begodu sibumba umndeni weentjhabatjhaba.
Ngokuzibophelela emmoyeni wo-Ubuntu, osisekelo sedemokhrasi yethu notholakala emthethwenisisekelo wethu, njengesitjhaba sizibophelela:
EkuHlonipheni isiThunzi somuNtu nekuLinganeni
Umthethosisekelo wethu ubeka bona abantu babelethwa batjhaphulukile begodu banesithunzi esilinganako.
Sizibophelela :
Ekuhlonipheni ubuntu bawo woke umuntu, kungaqalwa bona umuntu ubuyaphi ngokokuhlala, umhlobo, ubulili, ubudala, ijamo nobujamo esitjhabeni.
Ekulwiseni ukutlhoriswa kwabomma ngokomzimba nommoya okugcina ngokukata neminye imihlobo yokutlhorisa.
Ekupheliseni ukutlhoriswa kwabentwana okulethwa kungondleki, ukusetjenziswa kwabentwana, ukukhukhuthiswa kweendakamizwa, i-pornography (ukutjengiswa kweenthombe ezisileko) nokuthengisa ngomzimba.
Ekutlhogomeleni abangakaqini nabadinywe amathuba: abatlhagako, abadala, abarholopheleko, nabo boke abangakghoniko ukuzitlhogomela.
Ekuphikiseni omunye nomunye umhlobo wokutlhorisa ngokomzimba, ngokommoya kanye namkha nokutlhorisa ngokwengqondo namkha ukuphathwa kumbi komunye umuntu.
Ekwehluleni ukusetjenziswa kumbi kobujamo, isiko, umhlobo, ubulili, ukwenyula ngokobulili, ubujamo bezamaphilo namkha isiko elirholela ekubandlululeni omunye umuntu.
Ekusebenzeleni ukuphepha nokuvikeleka kwabo boke abantu ngokomzimba.
EkuPhuhliseni iKululeko, ukuSebenza komThetho neDemokhrasi
Ikululeko yomuntu ngamunye ngaphakathi kokusebenza komthetho isisekelo sobulungiswa, ukulunga, ukwakha isitjhaba nokubusa okuhle.
Sizibophelela :
Ekuvumeleni ikululeko yokukhuluma ngokutjhaphuluka, yokuhlanganyela, yokukhamba, yokuhlala, yokukholwa, yombono nekolo.
Emuzweni wokuziphendulela ekuhlaleni ngokuhlonipha ukusebenza komthetho, ukwethembeka, ukusebenza budisi namazinga amukelekako wokuziphatha kuhle kwesitjhaba.
Ekulweni nayo yoke imihlobo yobulelesi, ikohlakalo nenturhu.
Ekulweleni ukubumbana kwesitjhaba nokungahlukani kweRiphabhligi.
EkuThuthukiseni ukuPhila kuhle ngokweZinto nobuLungiswa kwezomNotho
Amalungelo wezokuhlalisana nomnotho alihlangothi lomthethosisekelo wethu kufanele athathwe njengento engaphezu kwamalungelo asemqondweni kuphela. Umthethomgomo namahlelo kuzakufanela bona anikele abatlhagako ngamathuba wokufikelela isithunzi sobuntu nokuphila kuhle ngokwezinto.
Sizibophelela :
Ekupheliseni ukungalingani okukhona kwesikhathi esidlulileko nesanjesi, kanye nokuphuhlisa amathuba wokwabelana ngemithombo yenarha yekhethu kiwo woke umuntu.
Ekuphikiseni umrhobholo, ukuziqala wena nokuzinothisa ngokungakafaneli ngazo zoke iinkhathi.
Ekupheliseni ikohlakalo, nanyana ilethwa kuzuza komuntu, kungathembeki, ukuthanda nokwenyula abanye namkha ezinye iinkhuthazo.
Ekukhuliseni ukwenzela izinto emkhanyweni kombuso kanye namabhizinisi ngelwazi elitholakala kusese nesikhathi, elifikelelekako nelinembako eendabeni zoke ezithinta ipilo yomphakathi.
Ekuqinisekiseni bona imikghwa emihle yokuphatha nokuqatjha etjengisa ikghono iba nomphumela wokujanyelwa ngokunaba kwemihlobo kanye nobulili boke.
EkuQiniseni amaGugu womNdeni newomPhakathi
Umndeni nomphakathi sisekelo esiqakathekileko samayunithi wokuhlalisana akhuthaza abe enze amagugu wokuziphatha nemikghwa emphakathini.
Sizibophelela :
Ekuphuhliseni amagugu womndeni, ifihlo, ukuziphendulela, ukuhlonitjhwa kwababelethi nabadala, ukukhuliswa kwabentwana, ukuthlogonyelwa kwabadala kanye nokuthuthukiswa nokugcinwa kwamakhaya.
Ekulwiseni inturhu yangekhaya nokubalekelwa kweembopho zomndeni, nanyana kungaba ngebanga lokusebenzisa kumbi iindaki, ikolelo yezamasiko namkha ukubandlulula ngokobulili.
Ekutjaleni ibhoduluko lomndeni nomphakathi eliphuhlisa isiko lokutlhogomelana, lokwabelana nokubumbana.
Ekusebenziseni imithombo kuhle nangokulingana khona kuzakuzuza yoke imindeni namalunga womphakathi.
Ekuzuzeni kwabanye nathi ngokukhula komuntu nokufumana amakghono.
EkuGcineni ukweThembeka nesiThunzi
UkweThembeka nesiThunzi magugu aqakatheke khulu wedemokhrasi nokubusa okuhle.
Sizibophelela :
Ekuphuhliseni nekukhuthazeni itjhebiswano elihle, ukuthembana nokuphilisana emphakathini ukweqa ukwehlukana ngokomlando obekuyinto ekulu esikhathini esidlulileko.
Ekusebenziseni irherho lobulungiswa ukuhlawulisa yoke imihlobo yokweba, ukumukwa ngekani, ukufumbathisa, ukungathembeki nokusebenzisela iinrhuluphelo zakho.
EkuQinisekiseni ukuThula ngokweSiko, iKolo noNembeza
Ukwehluka kweSewula Afrika ngokomhlobo nobutjhaba kungakghona ukufakela ummoya nokunothisa irherho lesiko namagugu elingagcina amagugu atholakala kileTjhatha.
Sizibophelela :
Ekuphuhliseni ikululeko kanembeza, ukulibalelana kwezekolo nokwamukelwa kwemiqondo ehlukeneko yeenkolelo ngaphandle kokuthatha ihlangothi namkha ukwenyula.
Ekuphuhliseni ukucabanga okuzijameleko nokuhlabako kanye nesiko leempikiswano zokuzibandakanya.
Ekuphuhliseni ukuhlonitjhwa kwamarherho weenkolelo namagugu wabanye abantu.
Ekuphuhliseni ilungelo lesakhamuzi esinye nesinye lokuzwakalisa imibono yaso ngaphandle kokwesaba ukuhlatjwa kumbi, ukuthuselwa nokutlhoriswa.
Ekuphikiseni yoke imihlobo yokuba nemibono okungasiyo, kungeyomuntu, yekampani namkha ngokobulunga namkha ukuhlanganyela nehlangano eqalela phasi isithunzi sabanye.
Ekuphuhliseni amathuba wokulingana kibo boke abantu kufaka hlangana abarholopheleko nalabo abaphethwe yi-HIV / Aids kanye neminye imihlobo yobulwelwe.
EkuTjengiseni iHlonipho nokuTshwenyeka ngabo boke abaNtu
Ihlonipho, itlhogomelo nokutshwenyeka ngenye yamagugu asisekelo samagugu atholakala kiwo woke amaSewula Afrika. Siyavuma bonyana angeze kwaba nokuthula namkha ukuvikeleka ngaphandle kwehlonipho netlhogomelo.
Sizibophelela :
Ekuliseni ukusebenzisa ilimi elinehlamba nelitlhorisako ekuthintaneni kwethu nabanye.
Ekuphuhliseni ukuthula, ubungani, ukulibalelana nokubumbana kwesitjhaba phakathi kwemiphakathi yamasiko, yekolo neyamalimi.
Ekutjengiseni ihlonipho kibo boke abantu neenqhema zomphakathi.
EkuLweleni ubuLungiswa, ukuLunga nokuPhilisana ngokuThula
Ukuphilisana ngokuthula kufuna ubulungiswa, ukulunga nokuhloniphana njengesisekelo sokubuyisana kwesitjhaba. Ukupholisa imibono engasi mihle yangaphambilini nokwehlukana kuyafuneka ukuqinisekisa ukuphuhliswa kwamagugu wedemokhrasi, ubulungiswa emphakathini namalungelo asisekelo wobuntu kibo boke abantu.
Sizibophelela :
Ekuphikiseni ukuziphatha okunenturhu nokumbi ngehlonipho nokuzwisisa.
Ekuphikiseni abantu neenqhema ezifuna ukuthikameza ukuthula, ukunzinza nokuvikeleka kwesitjhaba ngemibono engasimihle yangaphambili kanye/namkha nokuziphatha okungasi ngekwedemokhrasi.
Ekunikeleni ngemisebenzi yezehlalakuhle neminye ngendlela engathathi ihlangothi, elungileko, enokulingana nenganyuliko kibo boke abantu.
Ngokukhumbula ubunaba nemibono engasimihle ebeyibumba isikhathi sethu esadlulako, siyalivuma itjhebiswano elingakaqini edemokhraisini yethu etjha. Lokhu kufuna ukuqiniswa kwamagugu wokuziphatha amukelekako anjalo angafiswa ukufikelelwa ngiwo woke amaSewula Afrika njengesisekelo sokufikelelana ngommoya owenza isitjhaba sethu sibe khona ukwazi bona iSewula Afrika ngeyabo boke abahlala kiyo.
